Fikret Asanit – “Fiqa” kur ka vendosur ta braktis Zvicrën dhe të sjell një copë guxim në vendlindje dhe një porosi për të rinjtë se edhe vendlindja mund të bëhet Zvicër, nëse çdo kush niset nga vetvetja për t’i eliminuar dobësitë që lidhen me mungesën shprehisë së punës dhe kurajën për iniciativë
Dikur shkuarja në kurbet, ishte ëndërr, sepse vetëm në ëndrra zhduket kufiri në mes të reales dhe imagjinares. Por, me kalimin e viteve u bë realitet gjithçka që përjetohej si gurë i shkulur jashtë vendlindjes, ndërkohë që pesha e mallit po rrokullisej pakthyeshëm në pjerrtësinë e viteve, si një top bore që fillon sa një arrë e përfundon sa një masë gjigante. Sa më e madhe kjo masë, aq më e madhe bëhet edhe ftohtësia që sjell jeta larg vendlindjes.
Ata që e provuan në lëkurën e tyre ftohtësinë e kurbetit, sot mund të krenohen, por edhe të zhgënjehen me të kaluarën e tyre në kalendarin e gjatë të jetës jashtë vendlindjes. Mund të krenohen sepse ia dolën të lëvizin nga pika zero statusin social dhe mirëqenia e tyre tani është e kënaqshme, ndërkohë që mund të zhgënjehen sepse kurbeti, përpos shprishjes së bërthamës familjare, sjell edhe telashe të shumta të globalizmit dhe integrizmit kulturor.
I vetëdijshëm për të gjitha këto dhe telashet tjera, një mërgimtar nga Kumanova ka vendosur ta kthej ëndrrën e kurbetit mbrapsht në vendlindje dhe t’i japë asaj përmasat e një guximi që meriton respekt dhe përkulje.
Është ky Fikret Asani nga Kumanova, i njohur me nofkën “Fiqa”, i cili ka vendosur ta braktisë Zvicrën dhe përvojën e tij 40 vjeçare si auto-mekanik ta transferoj në vendlindje, aty ku më së shumti ka nevojë për njerëz të kualifikuar si ai. Po ta pyesni atë se pse ka vendosur të kthehet përfundimisht, sigurisht që do të mbeteni të habitur nga përgjigja e tij, sepse motivi kryesor i tij nuk është paraja, por diçka tjetër. Ai edhe katër vite do të pensionohet dhe me një pension të Zvicrës në Kumanovë mund të bëjë një jetë komode. Pra, ai nuk është shumë i varur nga fitimi që mund ta nxjerr në ofiçinën e porsahapur në Kumanovë, ndonëse, siç thotë ai, askush nuk ka dëm edhe nga një burim shtesë financiar.
Pak biografi
Fikret Asani zanatin e mori nga vëllai i madh Shefketi i njohur në Kumanovë me pseudonimin Sheki, një mjeshtër me emër dhe famë në vitet shtatëdhjeta të shekullit të kaluar, atëherë kur në gishtërinjtë e njërës dorë numëroheshin automekanikët shqiptarë në këtë rajon. Dhe Fikreti ishte me fat, që në hapat e parë të zanatit ta kishte mentor pikërisht vëllain e tij – mjeshtrin Sheki. Kjo i mundësoi atij të përvetësoj shpejt fshehtësitë e zanatit të automekanikut dhe për rrjedhojë qysh ne moshën 12 vjeçare e kishte bërë remontin e parë të një “Fiati 650”, pasi që e njihte mirë çdo detaj te këtyre makinave te njohura atëbotë me emrin Fiat – Fiqa, prej kur edhe e mori edhe nofkën “Fiqa”, me të cilën nofkë të gjithë në Kumanovë e njohin.
Gjithkush që i ka kaluar disa dekada në kurbet, një ditë mendon të kthehet në vendlindje. Por jo çdo kthim bart në vete kuptimin e një ndryshimi. Kurbetçinjtë tanë duhet të kthehen, jo thjeshtë si njerëz që i ka brejtur malli i vendlindjes, por si kuadro që me dijen dhe përvojën e tyre mund të ndryshojnë shumëçka që lidhet me kulturën e punës, me mendësinë, me filozofinë e menaxhimit e të fitimit si dhe me idenë se nga vet ne varet zhvillimi i vendlindjes, dhe nga askush tjetër.
Edhe vendlindja mund të bëhet Zvicër
Ky ka qenë edhe motivi i Fikret Asanit kur ka vendosur ta braktis Zvicrën dhe të sjell një copë guxim në vendlindje, aty ku të gjithë ne ankohemi se nuk jemi mirë, se na mungon perspektiva, ndërkohë që harrojmë ta pranojmë se neve mbi të gjitha na mungon guximi për të dalë jashtë kornizave të përditshme të rutinës dhe shprehive tona, jo gjithmonë të mira. Ai ka ardhur edhe me një porosi për të rinjtë se edhe vendlindja mund të bëhet Zvicër nëse çdo kush niset nga vetvetja për t’i eliminuar dobësitë që lidhen me mungesën shprehisë së punës dhe kurajën për iniciativë. Pra duhet ta pranojmë se na mungon guximi të detektojmë dobësitë tona dhe të fillojmë të mendojmë se me një organizim perëndimor mund të sfidojmë shprehitë e këqija lindore dhe t’i lëvizim gjërat në drejtim pozitiv. (E.A)
Kumanovë, 13 maj, 2023
p.s
070 544 970
Whatsapp & Viber +41 76 733 65 30- këta janë nr. i telef. për të gjithë ata që duan ta kontaktojnë automekanikun “Fiqa”