• Today is: Friday, March 29, 2024

NË 80-VJETORIN E LINDJES SË FREDERIK RRESHPES

fakti
July19/ 2020
Nga Shaip BEQIRI
Sot është data 19 korrik 2020. Do të vijë një kohë kur dita e sotme e çdo vjeti do të shënohet duke u kujtuar si ditë e lindjes së njërit nga poetët tanë më të mëdhenj, Frederik Rreshpja. Për ç`kohë përrallis unë tash? Do të jetë koha kur ky kopsht yni letrar do të qërohet, dëliret e pastrohet nga barishtet e ferrishtet që kanë bliruar gjithandej duke ia nxënë frymën keq!… Atëherë do të duket rendi i madh i pemave, frutave dhe luleve të shumta, siç i ka hije çdo kopshti të vërtetë. Pema me emrin e Fredit aty do të jetë ndër ato që pikaset lehtësisht. Do të ketë edhe hijen poashtu të madhe, të bukur e të dendur…
Hëpërhë një përgjasim i asaj peme le të jetë kjo fotografi e Fredit (bërë më 23.11.1992 në Tiranë), tek e cila hija e kokës sime i bie atij mbi kraharor! Dhe ka dalë kështu jo nga shkathtësia ime prej fotografi. Përkundrazi.
Imazhi mund të përmbajë: 1 person
RRUZULLI TE VETULLA
Frederik Rreshpes
Ti bart trishtimin
Që perënditë lanë në tokë
Një dru në vendlindjen time
Në bregoren që bora kurrë s`e mbuloi
Plagën tënde ka brenda
Atje vjen përsëri ora
Me vdekur edhe një herë
Dallëndyshja jote e hutuar
Që bënte zogj të verbër
Çukit gëzhojën e dhembjeve të mia
E qerasa një yll të dehur
Që të rrinte rruzull te vetulla
Shi i përbaltur baladash
Ra shkretëtirave të këngës
Enisé enisé
Zürich, 19 qershor 2005