Sot (e enjte) në Prishtinë u realizua një aksion mjaft i rëndësishëm humanitar, i udhëhequr nga filantropi i përmasave globale, Lazim Destani, me ç’rast institucioneve shëndetësore të Kosovës iu dorëzua një donacion prej 15.000 testesh për Covid-19
“Ndihem mirë që arritëm ta sjellim në Prishtinë donacionin prej 15.000 testesh për Covid-19 që e realizuam së bashku me miqtë e mi sipërmarrës, Remzi Ejupi nga ‘Eurokoha’ dhe Nazmi Viqa nga ‘Abbruch AWR’.
Ishte ky një aksion që e ndërmorëm më se një muaj më parë në bashkëpunim me Ministrin e atëhershëm të Shëndetësisë Arben Vitia dhe që e mbyllëm me sukses këto ditë.
Për ta përmbyllur këtë aksion, sot së bashku me miqtë e mi udhëtuam me aeroplan privat nga Dyzeldorfi në Prishtinë. Po ditën e sotme, testet i dorëzuam në Institutin Kombëtar të Shëndetësisë Publike ku krahas drejtuesve të Institutit këtu ishin prezent Ministri i Shëndetësisë Armend Zemaj, ambasadori i Gjermanisë në Kosovë Christian Heldt si dhe autoritete të tjera të vendit.
Nga këto 15.000 teste, 12.000 janë për shëndetësinë në Kosovë, 2.000 do të dërgohen në Maqedoninë e Veriut dhe 1.000 janë për Luginën e Preshevës.
Shpresoj ky donacion të jetë një ndihmesë e efektshme në luftën kundër koronavirusit, si dhe uroj pandeminë ta kalojmë sa më shpejt duke iu kthyer normalitetit sa më parë”. ka shkruar në rrjetin social Facebook, Lazim Destani, President i korporatës Ecolog./ Gazeta FAKTI
