Kuvendi i Kosovës sot do të mbajë seancë, ndërsa në rend dite është votimi për Qeverinë Hoti. Seanca do të mbahet në ora 11:00, ndërsa një ditë më parë zyrtarë nga kjo parti kanë thënë se i kanë votat për krijimin e Qeverisë.
Kryetari i Lidhjes Demokratike të Kosovës, Isa Mustafa ka thënë se kanë bërë përgatitjet për seancën.
Ai u shpreh i bindur se sot do të votohet Qeveria Hoti dhe sipas tij nuk ka nevojë për një qeveri të tranzicionit.
Ndërsa, i mandatuari për kryeministër, Avduallah Hoti ka treguar se kush do të jetë në kabinetin e tij qeveritar nga LDK-j. Kjo parti do të ketë shtatë ministra dhe një zëvendëskryeministër, transmeton Telegrafi.
Driton Selmanaj – zëvendëskryeministër; Hykemte Bajrami – Ministër i Financave; Anton Quni – Ministër i Mbrojtjes; Vlora Dumoshi – Ministre e Kulturës, Rinisë dhe Sportit; Agim Veliu- Ministër i Punëve të Brendshme; Arban Abrashi- Ministër i Infrastrukturës dhe Ambientit; Armend Zemaj- Ministër i Shëndetësisë; Besian Mustafa – Ministër i Bujqësisë.
Ndryshe, Qeveria Kurti, u rrëzua më 25 mars, pas votimit të mocionit të mosbesimit, iniciuar nga partneri i koalicionit, LDK-ja.
Ndërkaq, njoftimi për dekretimin e Hotit erdhi pasi presidenti Hashim Thaçi më 22 prill, konstatoi se Lëvizja Vetëvendosje, si fituese e zgjedhjeve të 6 tetorit, 2019, nuk e kishte shfrytëzuar mundësinë kushtetuese për propozimin e mandatarit, andaj këtë të drejtë ia kaloi LDK-së, si partia e dytë më së shumti vota në zgjedhjet e fundit.
Çështjen e dekretit Vetëvendosje e kishte dërguar në Gjykatën Kushtetuese, transmeton Telegrafi.
Pas kësaj, Kushtetuesja më 1 maj kishte vendosur si masë të përkohshme deri më 29 maj duke pezulluar deri në një vendim të plotë dekretin e presidentit Hashim Thaçi për të mandatuar Avdullah Hotin e Lidhjes Demokratike të Kosovës për kryeministër.
Ndërkaq, më 28 maj Gjykata Kushtetuese i hapi rrugë formimit të një qeverie të re me një votim shtatë pro dhe dy kundër dekretit të presidentit, Hashim Thaçi për mandatarin e Qeverisë.
Kushtetuesja ka konstatuar se dekreti i Presidentit është në përputhshmëri me paragrafin 2 të nenit 82 të Kushtetutës, duke konstatuar rrjedhimisht, që votimi i suksesshëm i një mocioni mosbesimi të Kuvendit ndaj Qeverisë, nuk rezulton në shpërndarjen e detyrueshme të Kuvendit dhe mundëson formimin e një Qeverie të re në pajtim me nenin 95 të Kushtetutës
Ndryshe, sot do të mbahet seanca ku në rend dite është votimi i Qeverisë Hoti.
Avdullah Hoti nis rrugëtimin si kryeministër i Kosovës… në këmbë
Avdullah Hoti po shkon sot drejt Kuvendit të Kosovës për të dalë nga aty si kryeministri i ri.
Por sot ai është parë të shkojë në Kuvend më këmbë.
Albin Kurti bën deklaratën e papritur: Ndjehem shumë mirë se…
Ndonëse sot mund të jetë dita e fundit e tij si kryeministër, Albin Kurti thotë se po ndjehet shumë mirë.
“Shumë mirë. Në ora 10:00 kemi një mbledhje të qeverisë ku do të marrim disa vendime të rëndësishme. Vendimi i parë që do ta nënshkruaj tash menjëherë është ai për ndihmën nga 30,000 euro dy familjeve të minatorëve që humbën jetën fatkeqësisht në Minierën e Artanës”.
Kurti nuk ka treguar nëse pret që Kosova të ketë qeveri të re sot, ndërsa ka vazhduar drejt ndërtesës së Qeverisë për mbledhjen – që mund të jetë e fundit – e drejtuar nga ai.