Lidhja Demokratike e Kosovës (LDK), edhe pse ka kërkuar nga Kuvendi i Kosovës, mbajtjen e seancës për formimin e Qeverisë Hoti, ende nuk dihet saktë nëse i ka siguruar numrat.
Deputeti i LDK-së, Haxhi Avdyli në një prononcim për Telegrafin ka thënë se në seancën e Kuvendit të Kosovës do të merret vesh nëse do ta votojë ose jo formimin e Qeverisë Hoti. Edhe deputeti i së njëjtës parti, Fatmir Rexhepi, nuk ka treguar nëse do ta votojë apo jo Qeverinë Hoti.
Ndërkaq, ende nuk dihet edhe mendimi i kryetares së Kuvendit të Kosovës, e cila vjen nga kjo parti politike, nëse do të jetë pro apo kundër kësaj Qeverie, raporton Telegrafi.
Në lidhje me këtë, shefi i Grupit Parlamentar të LDK-së, Arben Gashi në një prononcim për Telegrafin ka thënë se të mërkurën pritet të shihet votimi i Qeverisë Hoti.
“I kemi hy këtij procesi, dhe të shohim nesër në seancën e Kuvendit të Kosovës”.
I pyetur, nëse tashmë, një ditë para mbajtjes së seancës, janë vendos se cilat janë emrat e ministrave të kësaj qeverie, ai tha: “Sot mbas dite do të vendosim për emrat e ministrave”.
Megjithatë, Telegrafi ka mësuar nga një zyrtar i lartë i kësaj partie se nuk do të ketë ndryshime të mëdha në emrat e ministrave të LDK-së në qeverinë e re.
Ky burim ka bërë të ditur se Hykmete Bajrami nga ministria e Arsimit do të kalojë në postin e zëvendëskryeministres, Vlora Dumoshi pritet të vazhdojë në MKRS, Agim Veliu do të rikthehet në Ministrinë e Punëve të Brendshme dhe Administratës Publike, Arban Abrashi në Ministrinë e Infrastrukturës dhe Ambientit, Armend Zemaj në Ministrinë e Bujqësisë, Pylltarisë dhe Zhvillimit Rural.
Ndërkaq, nuk dihet nëse ministri aktual Lumir Abdixhiku do të kalojë në Ministrinë e Financave dhe Transfereve, apo nuk do të jetë pjesë e kabinetit qeveritar. Po ashtu, Besian Mustafa pritet ta lë postin e ministrit të Bujqësisë dhe të merr atë të udhëheqësit të Dikasterit të Integrimeve Evropiane në kuadër të MPJ.
Ndryshe, Kryesia e Lidhjes Demokratike të Kosovës (LDK) sot do të mblidhet rreth orës 16:30, ku pritet të zyrtarizohen edhe emrat e ministrave nga kjo parti.