• Today is: Thursday, October 28, 2021

ROMANI “UDHËKRYQI” I RAMADAN REXHEPIT BOTOHET NË SHKUP NGA SHTËPIA BOTUESE “AGORAPRINT”

fakti
September20/ 2021

Ditë më parë ka dalur nga shtypi romani “Udhëkryqi” i shkrimtarit disident Ramadan Rexhepi, me parathënie të shkrimtarit dhe studiuesit Anton Nikë Berisha. Romanin e ka botuar shtëpia botuese AGORAPRINT nga Shkupi, me botues Emin AZEMIN.

Këtë roman autori nisi ta shkruajë që në vitin 1957 dhe vazhdoi me vite të tëra, duke e rimarrë e përpunuar disa herë. Në vitin  2010 e botoi  me titullin ”Stina e emrave të bukur ”, kurse dorën e fundit i dha në shtator të vitit 2018, duke kthyer dhe titullin e fillimit “Udhëkryqi”.

Në roman, siç veproi dhe në tregimet dhe novelat e botuara më 1963, shkrimtari Ramadan Rexhepi i dha përparësi artit, të bukurës  përmes të cilave i shqiptoi dukuritë e botës, po dhe tundimet dhe gjendjen e rëndë shpirtërore të tij e të njerëzve të tij.

Me mënyrën si u qaset dukurive të jetës konkrete, me gërmimin dhe me shpalimin e botës së brendshme të personazheve, Ramadan Rexhepi afrohet me prozatorët e mëdhenj botërorë.

Gjithë kjo, në një mënyrë ose në një tjetër, është njësuar në personazhin kryesor, Ilir Kelmendin. Brenda tij ai ngërthen intelektualët dhe njerëzit që vuanin e pësonin, duke u ballafaquar me dhunën shtetërore dhe marrëdhëniet e përmbysura, ku dëshmohet absurdi i veprimeve të organeve të shtetit e të pushtetit ndaj intelektualëve dhe ndaj bashkëkombësve të tij.

 

Romani UDHËKRYQI do të promovohet më 1 tetor në Institutine Trashëgimisë Shpirtërore dhe kulturore të Shqiptarëve në Shkup, ku prezent do të jetë edhe vet autori.

Këtë vepër lexuesit mund ta gjejnë në librarinë NOBEL në Shkup e  Tetovë, dhe së shpejti edhe në ato të  Prishtinës dhe Tiranës.